Հայաստանում ՏՏ ոլորտի համապարփակ կարգավորումների ներդրման նպատակով մշակվող օրենսդրական փաթեթի վրա աշխատանքը մեկնարկել է մոտ երեք տարի առաջ՝ միայն ամփոփագրով շուրջ 500 էջից բաղկացած առաջարկությունների հիման վրա։ Դրանց 80%-ը ներառվել է ՀՀ Ազգային ժողով ներկայացված նախագծում։
Այս մասին «Լոկալ մարտահրավերներ՝ գլոբալ լուծումներ» խորագրով Ինտերնետ կառավարման հայաստանյան համաժողովում ասաց Բարձր տեխնոլոգիական արդյունաբերության նախարարության իրավաբանական վարչության օրենսդրության բաժնի պետ Արտյոմ Մեսրոպյանը։
Նրա խոսքով՝ նախատեսվող փոփոխությունները միտված են թվային ոլորտում կայուն, անվտանգ և վստահելի միջավայր ստեղծելուն՝ ամրապնդելով ոլորտի ինստիտուցիոնալ կառավարման հիմքերը.
«Թվային ենթակառուցվածքները մեր թվային հասարակության ու տնտեսության ձևավորման հիմնարար տարրերն են, ազգային անվտանգության բաղադրիչ։ Պետությունն առանց մասնավոր հատվածի ներգրավման չի կարող լիարժեք բարեփոխումներ իրականացնել։ Թվային Հայաստանի կառուցման համար անհրաժեշտ է ակտիվ համագործակցություն», – նշեց Մեսրոպյանը։
ՀՏՀԳ կիբեռանվտանգության նախագծերի համակարգման ղեկավար Լիլիթ Խաչիկյանը ներկայացրեց, որ Համաշխարհային բանկի հետ համագործակցությամբ արդեն ավարտվել են համայնքների կիբեռհասունության գնահատման գործընթացները, իսկ հաջորդ փուլում կիրականացվի հեռահաղորդակցության օպերատորների կիբեռհասունության գնահատում։
Համաշխարհային բանկի ներկայացուցիչ Հիմատ Սինգ Սանդհուն հավելեց.
«Կիբեռանվտանգությունն այսօր ոչ միայն տեխնիկական, այլ պետական դիմակայության և քաղաքացիների անվտանգության հարց է։ Մեր նպատակը կառավարությանը աջակցելն է այնպիսի մեխանիզմների ներդրման գործում, որոնք կբարձրացնեն հանրային վստահությունը և կբարելավեն կարգավորողների աշխատանքը»։
ՀԾԿՀ Հեռահաղորդակցության վարչության պետ Արմեն Հունանյանն ընդգծեց հեռահաղորդակցության օպերատորների առանցքային դերը՝ որպես տեխնոլոգիական ենթակառուցվածքների և անվտանգ ցանցերի ձևավորող.
«Այսօր օպերատորները մրցակցային միջավայրի դերակատարներ են, միաժամանակ պետության հիմնական գործընկերները՝ կապի հասանելիության և անվտանգության ապահովման հարցում։ Օրենսդրական նոր հենքը բոլորին կտա խաղի նույն կանոնները, ինչը կբարձրացնի ողջ համակարգի հուսալիությունը»։
Կիբեռվարժանքների, ոլորտի կադրային ներուժի զարգացման և կրթական ծրագրերի արդիականացման անհրաժեշտության մասին խոսեց «Հայաստանի օպերատորների միություն» ՀԿ-ի տնօրեն Քրիստինե Գյոնջյանը.
«Հեռահաղորդակցությունն այլևս պարզապես ծառայություն չէ․ այն երկրի անվտանգության և տնտեսական կայունության գործոն է։ Թեև ոլորտում ներդրումների վերադարձը երկարաժամկետ է, օպերատորները շարունակում են զարգացնել ենթակառուցվածքները։ Շարունակական զարգացման համար կարևոր է, որ պետական քաղաքականությունը լինի կանխատեսելի և աջակցող»։
ArmIGF 2025-ի քննարկման մասնակիցներն ընդգծեցին, որ տեխնոլոգիաների զարգացմանը զուգահեռ աճում է թվային ենթակառուցվածքներն այդ տեխնոլոգիաներին համաքայլ, անվտանգ, դիմակայուն, հասանելի պահելու պատասխանատվությունը։ Այդ ենթակառուցվածքները Հայաստանի զարգացման կարևորագույն գործոնն են, որի ապահովումը պահանջում է բազմաշահառու համագործակցություն։
