Կիբերանվտանգության եւ SMM դասընթաց՝ Լոռու մարզի գրադարանավարների համար
Լոռու մարզի գրադարանները համակարգիչներով եւ լայնաշերտ ինտերնետով ապահովելու եւ դրանք համայնքային կենտրոններ դարձնելու ծրագրի առաջին փուլն ավարտին մոտ է։
«Ինտերնետ հանրություն Հայաստան հատված» ՀԿ-ը բոլոր 14 գրադարաններին տրամադրել է համակարգիչներ՝ համալրված գրադարանների թվային կառավարման ծրագրով, WiFi երթուղիչներ եւ արագ ինտերնետ կապ։
«Հայաստանի Լոռու մարզում համայնքային կենտրոնների ստեղծում՝ հիմնված թվայնացված գրադարանների վրա…» ծրագրի առաջին փուլի ավարտին կազմակերպությունը Վանաձորում անցկացրեց նաեւ դասընթաց։ Մարզի 14 գրադարանների ավելի քան 30 աշխատակիցներին կազմակերպության փորձագետները ներկայացրել են կիբերանվտագության հիմունքները, սոցիալական հարթակներում անվտանգ եւ արդյունավետ գործելու սկզբունքները։
Հատուկ նշվել է, որ անվտանգության առումով չափազանց կարեւոր է, որ գրադարանները սոցիալական էջերից զատ, ունենան նաեւ իրենց անհատական կայքերը, որտեղ կզետեղվեն բոլոր տեղեկությունները։ Փորձագետները նաեւ առաջարկել են կազմակերպության աջակցությունը գրադարանների համար .հայ դոմենով կայքերի գրանցման գործում։
Ներկայացվել են նաեւ գրադարանների առցանց կառավարման ծրագրի առավելությունները, ինչը էապես օգնում է գրադարանի վարման պրոցեսին։
«Թվային կառավարման ծրագրի գործարկումով կկրճատենք կազմակերպական աշխատանքին տրամադրվող ժամանակը, կբարձրացնենք սպասարկման որակը։ Իսկ դասընթացի շնորհիվ արդեն սոցցանցերում ավելի ակտիվ ու տեխնիկապես գրագետ կլինենք»,- նշեց Ստեփանավանի կենտրոնական գրադարանի տնօրեն Էմիլյա Քեղինյանը։
Ի դեպ, դասընթացին ներկա էին նաեւ Դսեղ գյուղի գրադարանի եւ վարչական շրջանի ներկայացուցիչները։ Այս գրադարանը ներգրավված չի եղել ծրագրում, սակայն կազմակերպությունը խոստացավ քայլեր ձեռնարկել եւ այն նույնպես ներառել ծրագրում։
