Անձնական տվյալների (ԱՏ) պաշտպանությունը թվային դարաշրջանում առավել քան կարևոր է և տեխնոլոգիաների զարգացմանը զուգընթաց ինչպես դրանց վտանգման, այնպես էլ պաշտպանության նոր հնարավորություններ են ստեղծվում։
«Աղջիկները ՏՀՏ-ում» միջազգային արշավի շրջանակում ապրիլի 26-ին Ջերմուկում կայացած դասընթացում ներկայացվեցին ԱՏ պաշտպանության հիմնական սկզբունքները։
Կիբեռանվտանգության փորձագետ Ալեքսեյ Չալաբյանի խոսքով՝ երկար և բազմազան նիշերից բաղկացած գաղտնաբառ ունենալը պարտադիր, սակայն ոչ բավարար պայման է թվային տարածքում պաշտպանված լինելու համար։
«Սա նվազագույնն է այն քայլերից, որոնք անհրաժեշտ են բանկային հաշիվները, սոցիալական ցանցերի, էլեկտրոնային փոստի և այլ օգտահաշիվներն անվտանգ պահելու համար»,- ընդգծեց Չալաբյանը։
Ցանկացած տեղեկություն, որը կարող է ուղղակի կամ անուղղակի կերպով նույնականացնել անձին, համարվում է անձնական տվյալ։ Անձնական տվյալների պաշտպանության փորձագետ Գևորգ Հայրապետյանի խոսքով՝ թեև սահմանումը հստակ է, սակայն ԱՏ տեսակները զարգանում են տեխնոլոգիաների առաջընթացին համաքայլ, ուստի դրանց պաշտպանության մեթոդները ևս պետք է շարունակաբար վերանայվեն և ամրապնդվեն։
Արհեստական բանականության որևէ գործիքի կիրառումը նույնպես անհրաժեշտ է դիտարկել նաև ԱՏ պաշտպանության տեսանկյունից և տեղեկությունները տրամադրելիս խուսափել անձնական տվյալների՝ անուն, ազգանուն, պաշտոն ամբողջական տրամադրումից։
«Տվյալների պաշտպանությունը, բացի օրենսդրական կարգավորումից, պահանջում է նաև յուրաքանչյուր մարդու անհատական պատասխանատու մոտեցում։ Անկախ համակարգերից և տեխնիկական լուծումներից՝ մենք ինքներս պետք է լինենք մեր տվյալների պաշտպանության առաջին գործում»,- նշեց Հայրապետյանը։
Հ.Գ. Դասընթացը լուսաբանել է iTel .am – ը։
