Համացանցը բաց, անվտանգ և հասանելի դարձնելու ուղղությամբ կենսական նշանակության ծրագրեր է իրականցնում համաշխարհային «Ինտերնետ հասարակություն» (Internet Society) կազմակերպությունը՝ ներգրավելով տարբեր երկրների գործընկեր ակտիվ 121 կազմակերպություններին։ Աշխատանքն իրականացվում է տեղական, տարածաշրջանային և գլոբալ մակարդակներում։
Ինչպես տեղեկացնում է Internet Society-ն, 2024-ին կազմակերպված վերապատրաստման դասընթացների թիվը կազմել է 133։ Բացի դրանից, կառուցվել ու շահագործվել են համայնքային ցանցեր՝ ինտերնետի հասանելիությունն ընդլայնելու նպատակով։
57 գործընկերների տրամադրվել է 161 դրամաշնորհ։ Դրանք ուղղվել են համացանցի մարտահրավերների լուծմանը, թվային տնտեսության զարգացմանը, համատեղվել են ջանքերն առցանց գաղտնիության ապահովման համար։
Նշենք, որ մեր կազմակերպությունը՝ «Ինտերնետ հասարակության Հայաստան հատված» ՀԿ-ն, նախորդ տարի Internet Society-ի ֆինանսավորմամբ ձեռնարկել է 5 նախագիծ, որոնցից 1-ի իրականցումը դեռ ընթացքի մեջ է։
Հայաստանյան ծրագրերը նպաստել են համացանցի հասանելիության ընդլայնմանը, թվային գրագիտության բարձրացմանը և անվտանգության ապահովմանը։
