Դեռահասների համար ծրագրավորման «Իրերի համացանց» երկամսյա դասընթացի երկու մասնակցի, որոնք դասընթացի ժամանակ ակտիվություն եւ մեծ հետաքրքրություն են դրսեւորել, «Ինտերնետ հասարակության Հայաստան հատված» ՀԿ-ն համակարգիչ է նվիրել։
Լիլիթ Ալիխանյանը Վանաձորից է, Շահեն Գյուրջյանը՝ Գորիսից։ Նրանք հետաքրքրված են ՏՏ ոլորտում մասնագիտանալու հեռանկարով եւ արդեն ցուցաբերում են լավ կարողություններ։
«Դպրոցի ռոբոտաշինության խմբակում շատ բան եմ սովորել, բայց այս դասընթացում նոր գիտելիք ու նոր ընկերներ ձեռք բերեցի։ Ամեն դեպքում, իմ ապագան ծրագրավորումը պիտի լինի»,-մանրամասնել է Լիլիթը։
«Արդեն սովորելու իմ պարտադիր գործիքը՝ համակարգիչն ունեմ։ Կարիքը շատ էի զգում։ Սա ինձ համար շատ պետքական նվեր է, շնորհակալություն»,- հաջողության հասնելու խոստումով ասել է Շահենը։
«Ինտերնետ հասարակության Հայաստան հատված» ՀԿ-ն, հավատարիմ մնալով իր գործունեության առանցքային սկզբունքին, կշարունակի ժամանակակից գիտելիք եւ կրթություն ստանալու հնարավորություն տալ ՏՏ ոլորտով հետաքրքրված աշակերտներին։
Այս մասին փաստել է ԻՀՀՀ ՀԿ նախագահ Իգոր Մկրտումյանը եւ հավելել. «Աշխատաշուկայում գնահատվում են փաստացի գիտելիքն ու հմտությունը։ Իսկ ինտերնետն ինքնակրթության անսպառ ռեսուրս է, եւ կարեւորում ենք, որ դեռահասները համակարգիչ ունենան, տիրապետեն ոչ միայն թվային գրագիտության հիմունքներին, այլեւ սովորեն ՏՏ ոլորտի որեւէ մասնագիտություն։ Դա որոշիչ կարող է լինել մեր երկրի ապագայի համար»։
Եկամսյա դասընթացներին Երեւանից եւ հանրապետության տարբեր մարզերից մասնակցել է 80 դեռահաս, նրանցից 12-ը՝ հատուկ կարիքներով։ Ծրագիրն իրականացվել է ՅՈՒՆԻՍԵՖ-ի հետ համագործակցությամբ։
