Աշխարհում տարբեր ձևաչափերով վեցերորդ տարին անընդմեջ միջոցառումներ են անցկացվում Ծածկագրման միջազգային օրվա առթիվ։ Այս տարի նունյպես այն կնշվի հոկտեմբերի 21-ին, ավելի քան 60 երկրում՝ «Պատկերացրու աշխարհն առանց ծածկագրման. պաշտպանելով թվային վստահության հիմքերը» խորագրի ներքո։
Հայաստանը, ի դեմս «Ինտերնետ հասարակության Հայաստան հատված» ՀԿ-ի (ԻՀՀՀ), առաջիններից է միացել այս նախաձեռնությանը։ 2023-ից կազմակերպությունն ամեն տարի ծածկագրման թեմայով միջոցառումներ է անցկացնում՝ ներգրավելով ոլորտի փորձագետներին և շահագրգիռ կողմերին։
«Համացանցի անվտանգությունը բազմաշերտ ու բազմակողմանի աշխատանք է պահանջում, որի կարևոր բաղադրիչներից մեկը ծածկագրման նշանակության մասին իրազեկումն է։ Ամենամյա միջոցառումները նաև մասնագիտական համայնքի համախմբման և ոլորտի կարևոր հարցերը հանրամատչելի կերպով քննարկելու բաց հարթակ են»,- նշում է «Ինտերնետ հասարակության Հայաստան հատված» ՀԿ խորհրդի նախագահ Վեսմիրա Հարությունյանը։
Հայաստանում կազմակերպության նախաձեռնած միջոցառումների թեմաները տարիների ընթացքում ընդլայնվել են։ Անձնական տվյալների պաշտպանությունից և անվտանգ հաղորդակցությունից մինչև հետքվանտային գաղտնագրություն, ֆինանսական ու պետական համակարգերի անվտանգություն և ծածկագրման իրավական կարգավորում՝ քննարկումները ցույց են տալիս, որ ծածկագրումը միայն տեխնոլոգիական մասնագետներին վերաբերող հարց չէ։ Այն անմիջականորեն առնչվում է յուրաքանչյուր համացանցից օգտվողի հաղորդակցության, անձնական և այլ տվյալների գաղտնիությանը, անվտանգությանը և թվային ծառայությունների նկատմամբ վստահությանը։
Ծածկագրման միջազգային օրվա (Global Encryption Day) նպատակը ոչ միայն հանրությանը դրա մասին տեղեկացնելն է, այլ նաև ուղղերձ կառավարություններին՝ չթուլացնել ծածկագրման համակարգերը՝ դրանցում հատուկ հասանելիության հնարավորություններ ստեղծելով, քանի որ նման լուծումները կարող են նոր խոցելիություն առաջացնել և վտանգել համացանցից օգտվողների անվտանգությունը։
Ծածկագրման միջազգային օրը 2021-ին՝ իր գործունեության երկրորդ տարում, հռչակել է Գլոբալ ծածկագրման կոալիցիան (Global Encryption Coalition-GEC)։ Այն համախմբում է քաղաքացիական հասարակության կազմակերպությունների, ՏՏ ոլորտի ընկերությունների և այլ շահագրգիռ կողմերի՝ ուժեղ ծածկագրումը պաշտպանելու և համացանցն ավելի անվտանգ դարձնելու ընդհանուր նպատակի շուրջ։ Նախաձեռնության առաջին տարում կոալիցիային միացել էին 168, իսկ այսօր արդեն 466 կազմակերպություն և անհատ փորձագետ՝ 108 երկրից։
