Աշխարհում արդեն 241,700 կրիպտո միլիոնատեր և 36 կրիպտո միլիարդատեր կա։ Վերջին մեկ տարում կրիպտո միլիոնատերերի թիվն աճել է 40, միլիարդատերերինը՝ 29%-ով։ Իսկ Համաշխարհային կրիպտո կապիտալն այս տարվա հունիսի դրությամբ կազմել է 3.3 տրիլիոն ԱՄՆ դոլար, ինչը նախորդ տարվա համեմատ 45%-ով ավելի է։
Կրիպտո շուկայի այս աննախադեպ աճը մի կողմից ստեղծում է ֆինանսական ազատության նոր մակարդակ, մյուս կողմից՝ բերում նոր ռիսկեր, որոնց գիտակցումը պարտադիր է յուրաքանչյուր օգտատիրոջ համար։ Կրիպտոն անվտանգ է միայն այն դեպքում, երբ օգտատերը գիտի իր պատասխանատվության սահմանները։
«Կրիպտո շուկայում քո գումարը պաշտպանող վերջին մարդը հենց դու ես։ Իսկ անվտանգ մնալու բանաձևը երեք տարր ունի՝ գիտելիք, զգուշություն և սառը բանականություն», – ընդգծեց Coinplus կրիպտո դրամապանակի հիմնադիր Վիգեն Առուշանյանը՝ YouthIGF Armenia համաժողովում։
Անդրադառնալով բլոկչեյնի, կրիպտոարժույթների և թվային դրամապանակների կիրառման հիմունքներին՝ Առուշանյանը մասնավորեցրեց, որ ապակենտրոնացման սկզբունքով գործող բլոկչեյնում գործարքները գրանցվում են հաջորդական «բլոկների» տեսքով և հասանելի են ամբողջ ցանցին, չեն փոփոխվում, չեն ջնջվում, ինչը բարձրացնում է բլոկչեյնի հանդեպ վստահությունը։ Իսկ կրիպտոշուկան զարգանում է հենց այդ տեխնոլոգիայի հիման վրա, որում կիրառվող կրիպտոարժույթներից ամեամեծ բաժինը՝ շուրջ 60%-ը Bitcoin-ն է։ Ու թեև կրիպտոգործարքներն արագ են, միջազգային և առանց միջնորդավճարի, բայց սխալվելու հնարավորություն չեն տալիս՝ սխալ հասցե ուղարկված գումարը վերադրաձնել հնարավոր չէ։ Թվային դրամապանակը, որը հավելված է, պահում է վճարային քարտերը, կրիպտոյի մուտքային բանալիները կամ թվային ակտիվները։ Դրանք կորցնելը՝ կնշանակի կորցնել գումարը։ Արդեն 4.4 մլիլիարդ մարդ հնարավորություն ունի վճարել NFC/QR-ով, փոխանցումներ անել և կառավարել ակտիվները առանց քարտի կամ կանխիկի՝ թվային դրամապանակների շնորհիվ։
Վիգեն Առուշանյանը շեշտեց նաև կրիպտոաշխարհում ամենակարևոր կանոները՝
- Ոչ մի դեպքում չկիսվել seed phrase-ով,
- Չբացել կասկածելի հղումներ,
- Չհավատալ «արագ շահույթի» կամ «անվճար կրիպտոյի» առաջարկներին,
- Գործարքներն իրականացնելիս նախ կատարել փոքր փորձնական փոխանցում,
- Չպահել մեծ գումարներ բորսաներում։
Կրիպտոարժույթների ու բլոկչեյնի ոլորտը գնալով ավելի մասշտաբային տնտեսական ուժ է դառնում և դրա անվտանգ օգտագործումը կախված է առաջին հերթին օգտատիրոջ վարքագծից և տեղեկացվածությունից։
