Տեղեկատվական ժամանակակից տարբեր տեխնոլոգիաներից օգտվելու հմտությունները տարեցների համար կարևոր են կենցաղն ինքնուրույն, անվտանգ և հեշտ կազմակերպելու, ցանկության դեպքում՝ անգամ նոր մասնագիտություն յուրացնելու համար։
«Տարեցների կիբեռանվտանգության և տեխնոլոգիական հմտությունների բարելավում» կրթական ծրագիրը, որի առաջին փուլը մեկնարկեց ապրիլի 1-ին՝ Հայ-հնդկական գերացանցության կենտրոնում, ուղղված է հենց այս խնդիրների լուծմանը։ Առաջին փուլում դասընթացին կմասնակցի 12 տարեց։
Ծրագիրը ֆինանսավորում է «Ինտերնետ հանրություն հիմնադրամը» (Internet Society Foundation` ISF), իրականացնում՝ «Ինտերնետ հասարակության Հայաստան հատված» ՀԿ-ն՝ «Ձեռնարկությունների ինկուբատոր հիմնադրամի», «Հայ-հնդկական ՏՀՏ գերազանցության կենտրոնի» և «Տարեցների առողջության և խնամքի ապահովման ասոցիացիայի» հետ համագործակցությամբ։
«Տարեցների, հատուկ կարիքներով անձանց ՏՏ գրագիտության բարձրացումը և հմտությունների զարգացումը մշտապես եղել է մեր կազմակերպության ուշադրության կենտրոնում։ Այս ծրագիրը մեր հերթական նախաձեռնություններից մեկն է, և ուրախ ենք, որ կարող ենք մեր գործընկերների հետ համատեղ այն կյանքի կոչել՝ բարձրացնելով 60+ տարիքի անձանց կյանքի որակը»,- հայտարարելով ծրագրի մեկնարկը՝ նշեց «Ինտերնետ հասարակության Հայաստան հատված» ՀԿ խորհրդի նախագահ Վեսմիրա Հարությունյանը։
Դասընթացի մասնակիցներին ողջունեցին նաև ծրագրի գործընկեր կազմակերպությունները։ Իրենք՝ մասնակիցները, որոնց թվում էին 65-85 տարեկան կանայք և տղամարդիկ, մեծ ոգևորությամբ արտահայտվեցին ընձեռված հնարավորության մասին՝ ներկայացնելով հեռախոսից և համակարգչից օգտվելու իրենց հմտությունները, այդ առումով՝ կարիքները։
«Մեր ժամանակ էլ համակարգիչներ կային Մերգելյան ինստիտուտում, բայց մի քանի սենյակ էին զբաղեցնում… Շատ բան է փոխվել, սա բացառիկ հնարավորություն է՝ բարելավելու մեր հմտությունները, առանց որոնց կյանքն այժմ դժվար է պատկերացնել»,- նշեց մասնակիցներից մեկը։
Հաշվիչ տեխնոլոգիաների ստեղծման, տնտեսագիտության, մանկավարժության, ֆիզիկայի և հարակից այլ ոլորտներում աշխատանքային տասնամյակների փորձ ունեցած տարեցները դասընթացի շրջանակում տեսական գիտելիքից զատ, կանցնեն գործնական պարապմունքներ։ Ընդհանուր առամբ, «Տարեցների կիբեռանվտանգության և տեխնոլոգիական հմտությունների բարելավում» կրթական ծրագրին առաջիկա 5 ամիսներին կմասնակցի 60+ տարիքի 25 անձ։
