Համացանցային հաղորդակցությունը հասանելի կլինի միայն դրա մասնակիցներին, թե՞ այլ կողմերի նույնպես՝ կախված է ծածկագրումից։ Այն կողմնակի հասանելիությունը կանխելու և անվտանգության ապահովման կարևորագույն գործիք է, որն ապահովում է տվյալների պաշտպանություն և անվտանգություն։
Թվային անվտանգության այս գործիքը՝ ծածկագրումն ունի տարբեր մակարդակներ և տեսակներ, որոնք «Ինտերնետ հասարակության Հայաստան հատված» ՀԿ-ի նախաձեռնած «Ծածկագրում՝ անվտանգ ինտերնետի բանալին» խորագրով միջոցառման ընթացքում ներկայացրեց կիբեռանվտանգության ինժեներ Արեգ Շմավոնյանը։
Միջոցառմանը մասնակցեցին ավելի քան 50 ուսանողներ չորս ուսումնական հաստատություններից՝ Երևանի պետական, Հայաստանի պետական տնտեսագիտական, Հայաստանում ֆրանսիական համալսարաններից և Ինֆորմատիկայի պետական քոլեջից։
«Ծածկագրեք ձեր հաղորդակցությունն առցանց հավելվածներում և հեռու պահեք ձեր անձնական, ֆինանսական, իրավական և ամենատարրական՝ տեղափոխությունների մասին տվյալները օտար աչքից ու ականջից»,- միջոցառման մասնակիցներին հորդորեց Արեգ Շմավոնյանը։
Նա նաև մանրամասնեց հավելվածներում կիրառվող ծածկագրման մեխանիզմները՝ շեշտելով, որ որոշ հավելվածներում (օրինակ՝ Signal, WhatsApp) ծածկագրումը գործում է ավտոմատ կերպով, իսկ մյուսներում (օրինակ՝ Telegram) այն թողնված է օգտատիրոջ ընտրությանը։
Լսարանին ներկայացվեցին նաև ծածկագրման հիմնական տեսակները․
- Symmetric encryption (սիմետրիկ ծածկագրում) – նույն բանալին օգտագործվում է և՛ ծածկագրման, և՛ ապագաղտնագրման համար։ Արագ է, բայց պահանջում է բարձր անվտանգություն բանալիի պահպանման հարցում։
- Asymmetric encryption (ասիմետրիկ ծածկագրում) – կիրառվում են հանրային և մասնավոր բանալիներ․ հանրային բանալին օգտագործվում է ծածկագրման, իսկ մասնավորը՝ ապագաղտնագրման համար։ Այն լայնորեն կիրառվում է էլեկտրոնային ստորագրություններում և ապահով կապի հաստատման մեջ։
- End-to-End encryption (սկզբնակետից վերջնակետ ծածկագրում) – հաղորդագրության բովանդակությունը հասանելի է միայն ուղարկողին և ստացողին՝ բացառելով կողմնակի հասանելիությունը։
Ծածկագրման կիրառումը նաև պատասխանատու և անվտանգ ինտերնետային վարքագծի ցուցիչ է։
