Ծածկագրման համաշխարհային օրն արդեն երրորդ անգամ նշվեց Երևանում։ «Ինտերնետ հասարկության Հայաստան հատված» ՀԿ-ն այս տարի նախաձեռնեց «Ծածկագրում՝ անվտանգ ինտերնետի բանալին» թեմատիկ հանդիպումը՝ «Ինտերնետ հասարակություն հիմնադրամի» աջակցությամբ։
Հանդիպմանը ՏՏ ոլորտի առաջատար մասնագետները ներկայացրեցին ծածկագրման դերը ինչպես ազգային անվտանգության և տվյալների պաշտպանության, այնպես էլ առանձին օգտատերերի անհատական պատասխանատվության հարցում։ Ըստ նրանց՝ ծածկագրումը ոչ միայն տեխնոլոգիական գործիք է, այլև մարդու հիմնարար իրավունքի՝ գաղտնիության երաշխիք։
Լսարանին ներկայացվեցին նաև ծածկագրման հիմնական տեսակները, մանրամասն անդրադարձ արվեց ծածկագրման կիրառություններին՝ մեսենջերներում, VPN ծառայություններում և առցանց հաղորդակցության այլ գործիքներում։
«Գաղտնիության և անվտանգության հավասարակշռություն․ կարո՞ղ է արդյոք ծածկագրումը կարգավորվել օրենքով» թեմայի հատուկ քննարկման ընթացքում ընդգծվեց, որ թեև որոշ երկրներում փորձ է արվում սահմանափակել ծածկագրման կիրառումը՝ հասարակական անվտանգության ապահովման պատրվակով, սակայն իրականում նման քայլերը կարող են լրջորեն վտանգել անձի ազատությունն ու բիզնես միջավայրը։
