Թվային գործիքների եւ արհեստական բանականության զարգացումն արդեն իսկ մեծապես ազդում են տնտեսության վերափոխման վրա, բայց ընդամենը 5 տարուց ներդրված կլինեն աշխարհի բիզնեսների 75%-ում ու կհանգեցնեն 14 մլն աշխատատեղերի կորստի։
Այս մասին «Ինտերնետ եւ նոր զարգացումներ. Աշխատաշուկայի թրենդները» խորագրի ներքո անցկացված Ինտերնետ կառավարման 8-րդ դպրոցում՝ ArmSIG-2024-ում խոսեց «Իննովենթ» ընկերության հիմնադիր-տնօրեն Դավիթ Սահակյանը։
Նա նաեւ տեղեկացրեց, որ ապագայում դեռեւս տեղ կունենան բիզնեսի ու տվյալների վերլուծաբանները, թվային մարկետոլոգները, հոգեբաններն ու արհեստավորները։
«Արհեստավորները մյուսներից շատ ավելի երկարատեւ պահանջված կլինեն աշխատաշուկայում, սակայն ստիպված կլինեն տիրապետել որոշակի թվային եւ արհեստական բանականությունից օգտվելու հմտությունների՝ իրենց ստեղծածն առցանց տիրույթներում ներկայացնել-վաճառելու համար։ Նոր ստեղծվելիք մասնագիտությունների մեծ մասը պայմանավորված կլինի օնլայն առեւտրի կազմակերպման տիրույթով»,-նշել է Սահակյանը։
Վերլուծական ու ստեղծագործական միտքը, այսինքն՝ խնդիրը վերլուծելու, լուծում առաջարկելու, հաղորդակցության եւ որոշում կայացնելու կարողություններն առաջնային կդիտվեն եւ հավասարաչափ կկարեւորվեն թվային գործիքների կիրառման հմտությունները։
Զուգահեռաբար օնլայն կրթական ռեսուրսների հասանելիությունը եւ հեռավար աշխատանքի հնարավորությունները կընդլայնվեն։
