Ինտերնետ կառավարման հայկական դպրոցն՝ ArmSIG2025-ն այս տարի անցկացվեց Սյունիքի մարզի Գորիս քաղաքում «Թվային անվտանգություն՝ վաղ տարիքից» խորագրի ներքո։
Միջոցառումը, որի նպատակն էր ընդգծել երեխաների թվային պաշտպանվածության կարևորությունը և ժամանակակից մեթոդների կիրառման անհրաժեշտությունը, համախմբել էր Մեղրի, Կապան, Սիսիան և այլ համայնքների գրադարանների ավելի քան 35 ներկայացուցիչների։ ArmSIG2025-ն արդեն 9-րդ անգամ կազմակերպել էր «Ինտերնետ հասարակության Հայաստան հատված» ՀԿ-ն։
«Երեխաներն այսօր թվային աշխարհի ակտիվ մասնակիցներ են, բայց հաճախ՝ առանց իրենց պաշտպանելու բավարար գիտելիքի։ Մեր նպատակը ժամանակակից տեխնոլոգիաներից հնարավորինս անվնաս օգտվող և գիտելիքով պաշտպանված հասարակություն ունենալն է։ Այդ գործում կարևոր է նաև ձեր մասնակցությունը»,- ողջունելով մասնակիցներին՝ նշեց «Ինտերնետ հասարակության Հայաստան հատված» ՀԿ խորհրդի նախագահ Վեսմիրա Հարությունյանը։
Երեխաների առցանց անվտանգությանն առնչվող իրավիճակների, մարտահրավերների, կիբեռբուլինգի, իրավական կարգավորումների մասին խոսեցին Երևանի թիվ 196 հիմնական դպրոցի տնօրեն Անուշ Նավասարդյանը, ԵՊՀ-ից տեղեկատվական անվտանգության դասախոս Դավիթ Ալավերդյանը և անձնական տվյալների պաշտպանության փորձագետ Գևորգ Հայրապետյանը։
Համայնքային գրադարանների աշխատակիցները, ովքեր երեխաների հետ հաղորդակցվող առաջնային օղակներից են, ստացան ոչ միայն տեսական գիտելիք, այլև փորձագետների հետ քննարկեցին իրական դեպքեր և ծանոթացան խնդրի իրավական կարգավորումներին։
Դասընթացի ավարտին մասնակիցներին հավաստագրեր հանձնեց «Ինտերնետ հասարկության Հայաստան հատված» ՀԿ նախագահ Իգոր Մկրտումյանը՝ շնորհակալություն հայտնելով հետաքրքրվածության և ակտիվ մասնակցության համար։
