Սյունիքի մարզային գրադարանում, Նռնաձոր եւ Ագարակ համայնքների գրադարաններում, ինչպես նաեւ Մեղրիի թիվ 1 եւ թիվ 2 դպրոցներում ու մարզամշակութային կենտրոնում մասնակի տեխնիկական վերազինում է կատարվել։
«Ինտերնետ հասարակության Հայաստան հատված» (ԻՀՀՀ) ՀԿ-ն նշված հաստատաություններին տրամադրել է ընդհանուր թվով 8 համակարգիչ, 2 WiFi երթուղիչ, ինչպես նաեւ՝ թվայնացված գրադարաններ եւ գրադարանների թվային կառավարման ծրագիր։
ԻՀՀՀ ՀԿ-ն այս նախաձեռնությունն իրականցրել է Վլադիմիր Մկրտումյանի դրամական նվիրատվության շնորհիվ։
«Սա ինձ համար կարեւոր է ոչ միայն նախապապիս՝ Բորիս Մկրտումյանի հիշատակն հարգելու, այլ նաեւ նրա ծննդավայրում՝ սահմանամերձ Մեղրիում համացանցն ու թվային կրթությունը հասանելի դարձնելու տեսանկյունից»,- նշել է Վլադիմիր Մկրտումյանը։
Այս նախաձեռնությունը ոչ միայն մարզի բնակիչների կրթական հնարավորությունների բարելավմանն է միտված, այլեւ արժեւորվում է որպես սերունդների սոցիալական պատասխանատվության օրինակ։
