Երեւանում էին Ինտերնետ հասարակության հիմնադրամի (Internet Society Foundation` ISF) ծրագրերի ավագ ղեկավար Ջեն Բիրդը եւ ասոցիացված ծրագրերի պատասխանատու Ռիգզին Քոլինսը։ Այցի նպատակն էր «Ինտերնետ հասարակություն Հայաստան հատված» ՀԿ-ի անձնակազմի, շահակից խմբերի եւ հիմնադրամի կողմից ֆինանսավորված կազմակերպությունների ներկայացուցիչների հետ հանդիպումը։
ԻՀՀՀ ՀԿ-ի գրասենյակում ողջունելով հյուրերին եւ հանդիպման մասնակիցներին՝ ՀԿ-ի խորհրդի նախագահ Իգոր Մկրտումյանը նշեց, որ կազմակերպությունն ակտիվորեն նախաձեռնում է բազմաբնույթ միջոցառումներ՝ հասարակության շրջանում մեդիա գրագիտության, կիբերանվտանգության, ինտերնետ հիգիենայի եւ այլ ուղղություններով իրազեկվածության մակարդակը բարձրացնելու նպատակով։ ԻՀՀՀ ՀԿ-ի ուշադրության կենտրոնում են նաեւ Հայաստանի մարզերի ու համայնքների ինտերնետ ենթակառուցվածքների եւ ռեսուրսների ապահովման խնդիրները։
«Փոքր ներդրումներով մեծ գործեր ենք անում։ Համագործակցում ենք տարբեր բիզնես կազմակերպությունների հետ, որոնք աջակցում են համայնքներին ինտերնետ հասանելիության ընդլայնմանը»,- նշեց Իգոր Մկրտումյանը։
ISF ներկայացուցիչները բարձր գնահատեցին ԻՀՀՀ ՀԿ-ի ծրագրերի իրականացման ընթացքն ու արդյունքները։ Նշվեց, որ զարգացման հաջողված մոդել է մարզերում սոցիալական խնդիրները նաեւ տեխնիկական աջակցությամբ լուծելու մոտեցումը։
Հյուրերը ծանոթացան նաեւ Հայաստանի ինտերնետ էկոհամակարգի ներկայացուցիչներին։ Հանդիպման մասնակից Smart City, Digi Lab (UNDP), UNICEF Armenia եւ այլ կազմակերպությունների ներկայացուցիչներն էլ խոսեցին ISF-ի ֆինանսական աջակցությամբ իրականացված ծրագրերի արդյունքներից եւ ներկայացրին իրենց ստեղծած թվային արտադրանքները, մասնավորապես «Անահիտը»՝ առաջին հայախոս ձայնային օգնականը, որը մշակվել է «Իրերի համացանց» երկամսյա դասընթացի շրջանակում։
ԻՀՀՀ ՀԿ-ի խորհրդի փոխնախագահ Քրիստինա Հակոբյանը, ամփոփելով հանդիպումը, հավելեց, որ հաջողությամբ իրականացված գաղափարները մոտիվացնում են թե՛ Ինտերնետ հասարակությանը, թե՛ շահագրգիռ խմբերին, եւ դեռ շատ գաղափարներ կան, որոնք սպասում են իրականացման։
Հանդիպման ավարտին կողմերն անդրադարձան նոր գաղափարներին եւ համագործակցության հեռանկարներին։
