ArmSIG-2024–ն անցկացվեց «Ինտերնետ եւ նոր զարգացումներ. Աշխատաշուկայի թրենդները» խորագրի ներքո՝ սեպտեմբերի 25-ին եւ 26-ին, Արմավիրում։ Նախորդ տարի կայացել էր Սպիտակում։
Նպատակը հանրության եւ հատկապես մարզերի բնակչության թվային գրագիտության, տեղեկատվական անվտանգության մակարդակի բարձրացումն է։Կրթական այս նախաձեռնության շրջանակում ոլորտի հայտնի մասնագետներն ու փորձագետները՝ Հայաստանից եւ արտերկրից, Արմավիրի շուրջ 50 բնակչի ներկայացրին ինտերնետ կառավարմանն առնչվող տարբեր ուղղությունների զարգացումները, ՏՏ ոլորտի միջազգային կրթաթոշակային ծրագրերին, տեղական ու գլոբալ համաժողովներին մասնակցելու կարգը։
«Կիբեռանվտանգության, անձնական տվյալների պաշտպանության հիմունքների մասին հանրությանը իրազեկելով՝ փորձում ենք մարդկանց ներկայությունը համացանցում ավելի արդյունավետ ու անվտանգ դարձնել։ Ցույց ենք տալիս թվային ռեսուրսները նպատակային կիրառելու հնարավորությունները»,-նշեց «Ինտերնետ հասարակության Հայաստան հատված» ՀԿ խորհրդի նախագահ Վեսմիրա Հարությունյանը։
Հայաստանը, ի դեմս «Ինտերնետ հասարակության Հայաստան հատված» ՀԿ-ի, 2017-ից միացել է Ինտերնետ կառավարման դպրոցների (SIG) համաշխարհային նախաձեռնությանը, որի շրջանակում «Ինտերնետ հանրություն» ՀԿ-ի աջակցությամբ արդեն 8-րդ անգամ կազմակերպում է ArmSIG։ Դպրոցը մինչ այսօր ունեցել է ավելի քան 300 մասնակից՝ տարբեր մասնագիտական ու տարիքային խմբերից։
