Առողջապահության համաշխարհային կազմակերպության տվյալներով՝ մինչև 2030-ն աշխարհում յուրաքանչյուր վեցերորդ մարդը կլինի 60 և ավելի տարեկան։ Հայաստանում, ըստ ՄԱԿ-ի կանխատեսումների, նույն տարիքային խումբը մինչև 2050-ը կկազմի բնակչության 31.5%-ը։
Այս համապատկերում առավել կարևոր է դառնում բոլոր տարիքային խմբերի, հատկապես տարեցների մասնագիտական ներուժի օգտագործումը, ինչը պահանջում է ՏՏ արդիական տեխնոլոգիաներից ինքնուրույն և անվտանգ օգտվելու կարողություն։
Այդ խնդիրների լուծմանը միտված «Տարեցների կիբեռանվտանգության և տեխնոլոգիական հմտությունների բարելավում» կրթական ծրագիրը նախատեսված է 60 և ավելի տարեկան 25 անձանց համար։
Ծրագիրը, որի երկրորդ փուլը մեկնարկել է ապրիլի 15-ին, ֆինանսավորում է «Ինտերնետ հանրություն հիմնադրամը» (Internet Society Foundation, ISF)։ Այն իրականացվում է «Ինտերնետ հասարակության Հայաստան հատված» ՀԿ-ի կողմից՝ համագործակցելով «Ձեռնարկությունների ինկուբատոր հիմնադրամի», «Հայ-հնդկական ՏՀՏ գերազանցության կենտրոնի» և «Տարեցների առողջության և խնամքի ապահովման ասոցիացիայի» հետ։
«Երկրի զարգացման ու անվտանգության համար առանձնապես կարևոր է յուրաքանչյուրի մասնագիտական ներուժի իրացումը և ժամանակակից կրթական ու տեխնոլոգիական պահանջներին համապատասխանելը։ Մեր կազմակերպությունը փորձում է այդ խնդիրը լուծել տարբեր ծրագրերով, որոնցից մեկն էլ լայն համագործակցությամբ իրականացվող այս ծրագիրն է»,– ողջունելով երկրորդ փուլի մասնակիցներին՝ նշել է «Ինտերնետ հասարակության Հայաստան հատված» ՀԿ խորհրդի նախագահ Վեսմիրա Հարությունյանը։
Ծրագրի մասնակիցները ընդգծել են նման ուսումնառության կարևորությունը և հույս հայտնել, որ դասընթացի տեսական և գործնական փուլերի ավարտին կկարողանան անվտանգ, առանց ավելորդ վախերի, վստահորեն և արագ օգտվել համացանցից, սոցիալական ցանցերից և հեշտությամբ լուծել ոչ միայն կենցաղային խնդիրներ, այլև ձեռք բերել նոր մասնագիտություն սովորելու հնարավորություն։
