Մաթեմատիկոս, բժիշկ, մանկավարժ, գործավար, հրուշակագործ, մանկաբարձ և այլ մասնագիտությունների տեր 60+ տարիքի կանայք ու տղամարդիկ հունիսի 1-ից միացել են «Թվային հմտությունների զարգացում խոցելի խմբերի համար» դասընթացին։
Internet Society Foundation-ի ֆինանսական աջակցությամբ «Ինտերնետ հասարակություն Հայաստան հատված» հասարակական կազմակերպության նախաձեռնած ծրագրի նպատակն է աջակցել ավագ սերնդի ներկայացուցիչներին՝ համացանցում ավելի ինքնուրույն և վստահ կողմնորոշվելու, առցանց ծառայություններից անվտանգ օգտվելու և թվային գործիքների օգնությամբ իրենց առօրյան առավել արդյունավետ կազմակերպելու հարցում։
Դասընթացի մեկնարկին մասնակիցներին ողջունեց «Ինտերնետ հասարակություն Հայաստան հատված» ՀԿ խորհրդի նախագահ Վեսմիրա Հարությունյանը։
«Հասարակության զարգացման համար ավագ սերնդի մասնագիտական ներուժն ու փորձը չօգտագործելն անփույթ շռայլություն կլիներ։ Սակայն տեխնոլոգիական արագ փոփոխությունների պայմաններում շատերը դժվարանում են լիարժեք օգտվել թվային հնարավորություններից։ Տարբեր ծրագրերի միջոցով մենք փորձում ենք նպաստել, որպեսզի հատկապես ավագ սերնդի ներկայացուցիչները ձեռք բերեն թվային միջավայրում անվտանգ, ճիշտ և ինքնուրույն կողմնորոշվելու գիտելիքներ ու հմտություններ»,- նշեց նա։
Դասընթացն անցկացվում է անվճար հիմունքներով՝ Հայ-հնդկական ՏՀՏ գերազանցության կենտրոնում։ Մեկ ամսվա ընթացքում՝ հունիսի 1-ից 26-ը, կենտրոնի մասնագետները 60+ տարիքի ավելի քան 50 մասնակիցների կներկայացնեն սմարթֆոնների և համացանցի հնարավորություններից անվտանգ ու արդյունավետ օգտվելու կանոններն ու գործնական հմտությունները։
Ծրագրի ընթացքում մասնակիցները կծանոթանան թվային անվտանգության հիմունքներին, առցանց ծառայությունների օգտագործմանը, հաղորդակցման և տեղեկատվության որոնման ժամանակակից գործիքներին, ինչպես նաև այն հնարավորություններին, որոնք կարող են հեշտացնել առօրյա կյանքը։
Նախաձեռնության հեղինակները վստահ են, որ թվային գրագիտության բարձրացումը ոչ միայն օգնում է ավագ սերնդին ավելի ակտիվ և անկախ լինել, այլև հնարավորություն է տալիս նրանց ներկա լինալու և որակ հաղորդելու արդեն նոր՝ թվային միջավայրին, իրենց հարուստ մասնագիտական ու կյանքի փորձով։
