Կոտայքի մարզի 15 գրադարաններ մինչեւ սեպտեմբեր կհամալրվեն 45 համակարգիչներով, մեկական WiFi երթուղիչով, 40 հազար անուն գրքի մատենագիտական տվյալների թվայնացված բազայով եւ թվային կառավարման ծրագրով։
Այս նախաձեռնությունը «Ինտերնետ հասարակության Հայաստան հատված» ՀԿ-ն մեկնարկել է 2024-ի հոկտեմբերին։
«Գրադարանների տեխնիկական վերազինումը եւ կառավարման համակարգի արդիականցումը կնպաստեն այդ կարեւորագույն կառույցների պահանջված երկարակյացությանը։ Բացի այդ մարզերի բնակիչներին կտան համացանցի կրթական ռեսուրսներից օգտվելու հնարավորություն»,- նշել է ԻՀՀՀ ՀԿ նախագահ Իգոր Մկրտումյանը։
Ծրագրի շրջանակում Կոտայքի մարզի Հրազդան քաղաքի չորս գրադարաններ (թիվ 1, 5, 6, 7 ) արդեն իսկ ստացել են թվային կառավարման ծրագրով ու գրադարանի թվայնացված բազայով հագեցած մեկական համակարգիչ եւ մեկական WiFi երթուղիչ։
Նաեւ անցկացվել են վերապատրաստման դասընթացներ գրադարանների աշխատակազմի համար։
