«Ինտերնետ հասարակության Հայաստան հատված» ՀԿ-ն արդեն մի քանի տարի թվային կառավարման և տեխնիկական վերազինման տարբեր ծրագրեր է իրականցնում մարզերում գործող գրադարաններում։
Աշխատանքի կազմակերպման, սպասարկման որակի և այցելությունների թվի բարելավման առումով ծրագրերի արդյունքներն արդեն իսկ զգալի են Լոռու, Կոտայքի մարզերի 30 գրադարաններում, որոնց նվիրաբերվել են՝
- Համակարգիչներ,
- Wi-Fi երթուղիչներ,
- լայնաշերտ ինտերնետ կապ՝ 6 ամսով։
ԻՀՀՀ ՀԿ-ն տվյալ գրադարաններում նաև ներդրել է թվային կառավարման համակարգ և կազմակերպել գրադրանավարների համապատասխան վերապատրաստման դասընթացներ, նվիրաբերել նաև գրքեր։
Սյունիքի մարզի 15 գրադարանների համար կազմակերպությունն առաջիկա մեկ տարում կիրականացնի «Գրադարանների թվային զարգացում․ ինտերնետ հասանելության կենտրոններ համայնքներում» ծրագիրը, որի մեկնարկը կտրվի հոկտեմբերի 11-ին՝ Գորիսում։
«Կրթական ժամանակակից, պահանջված ռեսուրսի հասանելիությունը նաև երկրի կրթամշակութային և տնտեսական զարգացման հիմքերից է։ Դրան հասնելու մեր քայլը գրադարանների արդիականացումն է և լայնաշերտ ինտերնետ կապի տրամադրումը»,- նշել է ԻՀՀՀ ՀԿ նախագահ Իգոր Մկրտումյանը։
Ի դեպ, ԻՀՀՀ ՀԿ ծրարգրերի արդյունավետությունը Վանաձորի և Սպիտակի երեք գրադարաններում գնահատելով, միջազգային գործընկերները, մասնավորապես՝ Ինտերնետ հասարակության հիմնադրամի (Internet Society Foundation` ISF) ներկայացուցիչները համարել են որոշակի սոցիալական խնդիրներ կանխելու նախադեպային օրինակ։
