Smart սարքերի կիրառման փորձն ընդլայնելու նպատակով՝ «Ինտերնետ հասարակության Հայաստան հատված» ՀԿ-ն մայիսի 24-ին նախաձեռնել էր Հաաստանի կույրերի միավորման եւ Տեսողական հաշմանդամություն ունեցողների վերականգնման Նիժնի Նովգորոդի «Կամերատա» մարզային կենտրոնի ներկայացուցիչների հանդիպումը։
Հայաստանի կույրերի միավորման մշակույթի տան տնօրեն Յուրի Ավետիսյանը հանդիպմանն ասել է. «Տպագիր տեքստ կարդալը, թղթադրամի արժեքը որոշելը, առարկաների ճշգրիտ տեղադիրքը պատկերացնելը եւ շատ այլ գործողություններ մեզ համար դժվարություն կմնային՝ առանց խելացի սարքերի»։
Հաշմանդամների ներուժի կիրառումը ոչ միայն անհատի լիարժեք ապրելու, այլեւ հասարակության աճի հնարավորություն է։ Այս տեսանկյունից ավելի նշանակալի արդյունքի համար, Ավետիսյանի խոսքով, համագործակցությունն առաջին քայլն է, ինչում պատրաստակամ են նաեւ ռուսաստանցի գործընկերները։
«Տեսողության խնդիրներ ունեցողներին օգնում ենք՝ տեսնելու իրենց ներուժը։ Այն կիրառելու համար մշակել ենք հատուկ դասընթացներ։ Տեֆլոինֆորմացիոն տեխնոլոգիաների՝ խելացի սարքերի, կիրառմամբ փորձում ենք ընդլայնել տեսողական խնդիրներ ունեցողների հնարավորությունները»,- տեղեկացրել է «Կամերատա» մարզային կենտրոնի տնօրեն Եկատերինա Մախնյովան։
