Լոռու մարզի երեք գրադարաններ, մասնավորապես՝ Սպիտակի քաղաքային գրադարանը, Լոռու մարզային գրադարանը եւ Վանաձորի գրադարանների կենտրոնացված համակարգն օրերս համալրվել են եւս 4-ական համակարգիչներով։
«Համակարգիչների առկայությունը, ինտերնետի հասանելիությունը մասնաճյուղերի եւ այցելուների հետ մեր աշխատանքն ավելի արդյունավետ կազմակերպելու հնարավորություն տվեցին։ Սրանք մեր ընթերցողների շրջանակն ընդլայնելուն նպաստող կարեւոր գործոններ են, որոնք ապահովեց «Ինտերնետ հասարակության Հայաստան հատված» ՀԿ-ն»,- նշեց «Վանաձորի գրադարանների կենտրոնացված համակարգ» ՀՈԱԿ-ի տնօրեն Մանե Մուրադյանը։
Գրադարանների էլեկտրոնային կառավարման եւ տեխնիկական վերազինման ծրագրերն իրականացնում է «Ինտերնետ հասարակության Հայաստան հատված» հասարակական կազմակերպությունը՝ Ինտերնետ հասարակության հիմնադրամի (ISF) աջակցությամբ։
Նպատակը, գրադարանները համայնքային ինտերնետ-կենտրոնների վերափոխմամբ, դրանք արդիականացնելն ու մարզերի բնակիչների համար համացանցի կրթական ռեսուրսներից օգտվելու հնարավորություն ստեղծելն է։
Բացի համակարգիչների տրամադրումից, ծրագրերում ընդգրկված են նաեւ լայնաշերտ ինտերնետ կապի ապահովումը, WiFi-երթուղիչների տեղադրումը, գրադարանային կառավարման էլեկտրոնային համակարգերի ներդրումը, ինչպես նաեւ կադրերի վերապատրաստման դասընթացները։
Ծրագրի շրջանակում ԻՀՀՀ ՀԿ-ն արդեն աշխատել է Լոռու մարզի 14 գրադարանների հետ։ Աշխատանքներն ընթացքի մեջ են Կոտայքի մարզի 15 գրադարաններում, իսկ Սյունիքի մարզում կմեկնարկեն 2025 թվականի հոկտեմբերին ու կիրականացվեն մեկ տարում։
