Արհեստական բանականության (AI) հնարավորություններն ու ռիսկերը, ինչպես նաև կիբեռանվտանգության կանոնները ներկայացվեցին ITU-ի «Աղջիկները ՏՀՏ-ում» միջազգային արշավի շրջանակում ապրիլի 26-ին Ջերմուկում տեղի ունեցած դասընթացին։
«Աղջիկները ՏՀՏ-ում. հաղթահարելով խոչընդոտները՝ հանուն ներառական թվային վերափոխման» խորագրով դասընթացը նախաձեռնել էին «Ինտերնետ հանրություն» և «Ինտերնետ հասարակության Հայաստան հատված» հասարակական կազմակերպությունները։
«Արդեն ութերորդ տարին է, ինչ մեր կազմակերպությունը միանում է այս միջազգային նախաձեռնությանը՝ Girls in ICT արշավին։ Այս տարի գալով Ջերմուկ՝ փորձել ենք միջոցառումը հասանելի դարձնել նաև մարզաբնակ կանանց ու աղջիկներին՝ ցույց տալով, որ ՏՀՏ ոլորտը բաց է բոլորի համար», – նշեց «Ինտերնետ հասարակության Հայաստան հատված» ՀԿ խորհրդի նախագահ Վեսմիրա Հարությունյանը։
Դասընթացին մասնակցեցին Վայոց Ձորի մարզի Եղեգնաձոր, Վայք և Ջերմուկ քաղաքների ավելի քան 20 կանայք՝ մասնագիտական տարբեր ոլորտներից։
«Աշխատում ենք հասարակության տարբեր տարիքային և սոցիալական խմբերի համար թվային կրթության, մեդիա գրագիտության և, իհարկե, AI-ն առօրյայում կիրառելու հմտությունը զարգացնելու և ռիսկերը կանխելու հնարավորություն ստեղծել»,- նշեց «Ինտերնետ հանրություն» ՀԿ խորհրդի փոխնախագահ Քրիստինա Հակոբյանը։
ՏՀՏ ոլորտում կանանց ներգրավվածությունը միջազգային մակարդակում չի գերազանցում 20%-ը։ Հայաստանում նույն ցուցանիշը շուրջ 40% է։ Ոլորտային կազմակերպությունների ներկայացուցիչների խոսքով, սա համեմատաբար բարձր արդյունք է, սակայն դեռևս շատ բան կա անելու կանանց և աղջիկների հնարավորություններն ընդլայնելու համար։
«Աղջիկները ՏՀՏ-ում» միջազգային արշավը նախաձեռնել է Հեռահաղորդակցության միջազգային միությունը (ITU)։ Նպատակը կանանց և աղջիկների ներգրավվածության ընդլայնում է ՏՀՏ ոլորտում։ Անցած 11 տարիներին աշխարհում իրականացվել է ավելի քան 11,590 միջոցառում 175 երկրներում՝ ներառելով ավելի քան 417,000 կին։ Հայաստանում արշավի շրջանակում 8 տարում անցկացված միջոցառումներին ներգրավվել է շուրջ 360 կին՝ տարբեր տարիքային և մասնագիտական խմբերից։
