Ծածկագրման համաշխարհային օրվա առիթով ( Global Encryption Day ) «Ինտերնետ հասարակության Հայաստան հատված» եւ «Ինտերնետ հանրություն» ՀԿ-ներն օրերս հրավիրել էին հանդիպման ոլորտի հետաքրքրված անձանց եւ մասնագետների։
«Ինտերնետ հանրություն» ՀԿ նախագահ Իգոր Մկրտումյանը ներկայացրեց ծածկագրման ոլորտում առկա գործընթացներն աշխարհում։ Նրա խոսքով, առկա խնդիրները եւ դրանք աշխարհում համատեղ ջանքերով լուծելու կարեւորությունը հաշվի առնելով էլ մասնագիտական համայնքը սկսել է հատուկ օրվա շրջանակում համախմբվել եւ լուծումներ փնտրել։ Հայաստանում Ծածկագրման համաշխարհային օրը նշվում է առաջին անգամ, սակայն այն նախաձեռնակ կազմակերպությունները նպատակ ունեն այն դարձնելու ամենամյա։ Մեր երկրում եւս այս ոլորտում կարգավորումների կարիք ունեցող բազմաթիվ հարցեր կան, որոնց մասին խոսեցին օրվա բանախոսները։
- Ծածկագրման ի՞նչ մեխանիզմներ են կիրառվում այսօր Հայաստանում եւ աշխարհում։
- Ինչպիսի՞ օրենսդրական կարգավորվումներ կան տվյալների հասանելիության եւ գաղտնիության առումով։
- Որո՞նք են հաղորդակցման ամենաապահով հավելվածներն այսօր եւ ինչո՞ւ։
- Ինչպե՞ս ավելի ապահով դարձնել էլ-փոստով հաղորդակցությունը, ի՞նչ վտանգներ կան։
- Ամպային սերվերների վրա ֆայլերը, նկարները եւ այլ տեղեկություններ պահելը որքանո՞վ է ապահով։
Այս հարցերի մասին ելույթները նաեւ ակտիվ քննարկումների տեղիք տվեցին։
Առաջիկայում այս ամենի մասին ավելի մանրամասն կներկայացնենք առանձին հրապարակումներով։
