Արհեստական բանականության (AI) նոր գործիքների ստեղծման գործընթացում 2024-ի առաջատարն ԱՄՆ-ն է՝ ողջ տարում ստեղծել է 40 AI գործիք։ Նույն ժամանակահատվածում Չինաստանում հեղինակել են 15, Եւրոպայում՝ ընդամենը 3 արհեստական բանականության գործիք։ Սակայն Չինաստանը վերջին 6 ամսում խիստ բարելավել է ցուցանիշները՝ ստեղծելով և հանրային կիրառության հանձնելով 40 նոր AI գործիք։
Չնայած աճող մրցակցությանը և նոր գործիքների բազմազանությանը, թե՛ աշխարհում, թե՛ Հայաստանում ամենից հաճախ և լայնորեն կիրառվող AI հարթակը շարունակում է մնալ ChatGPT-ն։
Այս հանգամանքը փաստվեց նաև ապրիլի 26-ին Ջերմուկում կայացած դասընթացում։
«Արագագործ այս գործիքը, ճիշտ կիրառության դեպքում, կարող է լինել մարդկության օգնականը՝ առօրյան հեշտ ու արագ կազմակերպելու, մասնագիտական իմացություններն ընդլայնելու, անգամ նոր մասնագիտություն սովորելու հարցերում։ Իսկ ChatGPT-ն կամ որևէ այլ գործիք արդյունավետ օգտագործելու առաջին քայլն այն համարձակ ու նպատակային կիրառելն է»,- նշեց ԻՀ ՀԿ SMM մասնագետ Ելենա Հարությունյանը։
Նրա խոսքով՝ AI տեխնոլոգիաների զարգացման այս փուլում մարդու գիտելիքի պաշարը և մասնագիտական հմտություններն ավելի քան երբևէ կարևոր են։ Քանի որ AI գործիքներով ստեղծված ամեն միավոր՝ լինի տեքստ, պատկեր, տեսաշար, տվյալագիտական կամ այլ արդյունք, իրականում մնում է անհատի ստեղծագործական աշխատանքի մի մասը և պահանջում է ստուգում ու ճշգրտում։
Դասընթացում մասնակիցները գործնականորեն ծանոթացան AI գործիքներին տրվող հրահանգների կարևորությանը։ Բանախոսը ցույց տվեց, թե ինչպես նույն գործիքը կարող է ստեղծել էականորեն տարբեր որակի արդյունքներ՝ կախված տեքստային հրահանգի ձևակերպումից։
ԻՀ ՀԿ-ի SMM մասնագետ Հարությունյանը մասնակիցներին ներկայացրեց ինչպես ChatGPT-ն՝ որպես առօրյան կազմակերպելու, մասնագիտական աճի, անգամ նոր մասնագիտությունների ձեռքբերման հզոր հարթակ, այնպես էլ տրամադրեց տեղեկություն այլ AI գործիքների մասին՝ ըստ գործառնական նշանակության։
Դասընթացը «Ինտերնետ հասարակության Հայաստան հատված» և «Ինտերնետ հանրություն» ՀԿ-ների նեխաձեռնությունն էր՝ «Աղջիկները ՏՀՏ-ում» միջազգային արշավի շրջանակում։
