Ծրագրավորման հիմունքներ եւ խելացի սարքերի նախագծում ուսուցանող «Իրերի համացանց» երկամսյա դասընթացն ավարտվեց նաեւ Երեւանում։ «Ինտերնետ հանրություն» ՀԿ գրասենյակում այսօր մայրաքաղաքի խմբի 8 մասնակիցներին շնորհվեցին ավարտական վկայականները։
«Ինտերնետը նաեւ ինքնակրթության անսահմանափակ ռեսուրս է, օգտագործեք այն՝ գնահատելով ձեր ժամանակն ու հնարավորությունները։ Այսօր աշխատաշուկայում կրթությունը հավաստող փաստաթղթից բացի եւ գուցե ավելի շատ գնահատվում են փաստացի իմացությունն ու հմտությունը։ Այնպես որ, հույս ունեմ կձգտեք ավելին իմանալու»,- նշել է «Ինտերնետ հասարակության Հայաստան հատված» ՀԿ նախագահ Իգոր Մկրտումյանը։
«Իրերի համացանց» դասընթացը՝ 14-18 տարեկանների համար, նախաձեռնել է ՅՈՒՆԻՍԵՖ-ը՝ «Ինտերնետ հասարակության Հայաստան հատված» եւ «Smart City» ՀԿ-ների հետ համագործակցությամբ ու ՌԴ ֆինանսական աջակցությամբ:
Դասընթացի մասնակից Դավիթ Ղափլանյանի կարծիքով՝ ծրագրավորման հիմունքների իմացությունը նպաստում է տարբեր ոլորտներում ավելի լավ մասնագիտանալուն։
«Հիմա մտածում եմ, որ պիտի լինեմ ռազմական ոլորտում հենց տեղեկատվական տեխնոլոգիաների կիրառումն այնտեղ ընդլայնելու համար։ Ուզում եմ՝ մարդիկ, ինչքան հնարավոր է, ապահով լինեն մարտի դաշտում…»։
«Դե՜, ես բժիշկ եմ դառնալու՝ վիրաբույժ։ Իսկ ծրագրավորման դասերին եկա, որ ստեղծեմ հեռավար վիրահատությունների սարքեր ու խելացի պրոթեզներ։ Դրանք հիմա պետք են, ես էլ ուզում եմ շատ լավերը ստեղծեմ, բայց, պարզ ա չէ՞, դրա համար դեռ շատ պիտի սովորեմ»,- ասում է Սամվել Աջիզյանը։
Դասընթացին մինչ օրս մասնակցել է ավելի քան 80 դեռահաս՝ Երեւանում, Հրազդանում, Վանաձորում, Գորիսում, Գյումրիում։ Մասնակիցները տեսական դասերից զատ, կատարում են նաեւ գործնական առաջադրանքներ։
