Համացանցը Հայաստան հասցնելու եւ .am դոմենը գրանցելու եւ զարգացնելու 30 ամյակի առիթով «Ինտերնետ հանրություն» ՀԿ-ն հանդես է եկել աննախադեպ նախաձեռնությամբ։ Հոբելյանական տարվա առիթով հատուկ հրահարակմամբ երկլեզու՝ անգլերեն սեղմագրերով, ամփոփել է անցած 30 տարիների պատմությունը՝ «Համացանցի մեր տարածքը՝ .am 30» խորագրի ներքո։
Համացանցը Հայաստան հասցնելու եւ .am դոմենի կառավարման գործի ակունքներում կանգնած անձինք ամսագրում հնարավորինս ամբողջական ներկայացրել են ՀԿ-ի գործունեության ընթացքը՝ կազմակերպության հիմնադրման օրերից մինչեւ ինտերնետի զարգացման ներկայիս փուլը։
«Համացանցի մեր տարածքը՝ .am 30»-ում ազգային դոմենի ստեղծման ու զարգացման իրադարձային հետաքրքիր մանրամասներով ներկայացվում է, թե ինչպես դոմենի կառավարումը միաժամանակ համացանցի եւ Հայաստանի թվային ինքնության զարգացման գործիք դարձավ ու մեծապես նպաստեց համաշխարհային թվային քարտեզում մեր երկրի դիրքավորմանը։
