Փրկագին՝ Ransomware կրիպտովիրուսը մի քանի օրում տարածվեց 150 երկրում՝ վարակելով 200 հազար համակարգիչ։ Անմիջական վնասը 4 միլիարդ, հետեւանքային վնասը 7 տրիլիոն դոլար կազմեց։
Բոլոր տեսակի ֆայլերը ծածկագրող, համակարգչին հասանելիությունը սահմանափակող այս կրիպտովիրուսը տվյալների եւ հասանելիության վերականգնման համար պահանջում է «փրկագին»՝ կրիպտոարժույթով։
Տարածվում է արագ, ավտոմատ կերպով, թիրախավորում բոլոր տեսակի դիվայսները։ Մուտք է գործում նաեւ ցանցեր՝ հիմնականում ֆիշինգային մայլերի, արդեն վարակակիր USB ֆլեշների եւ այլ միջոցներով։
«Ինտերնետ հասարակության Հայաստան հատված» ՀԿ-ի նախաձեռնած «Ծածկագրումը՝ թվային անվտանգության գործոն» աշխատաժողովում այս մասին խոսելով՝ կիբեռանվտանգության ինժեներ Արեգ Շմավոնյանն անդրադարձավ նաեւ Ransomware-ից խուսափելու կանխարգելիչ միջոցներին։
«Ծրագրերի ճիշտ ժամանակին թարմացումը, առկա կրիչների վրա կամ առցանց հարթակներում Back Up ունենալը, ցանցերի սեգմենտավորումը կօգնեն եթե ոչ լիովին ապահովագրվել Ransomware վիրուսից, ապա գոնե կփոքրացնեն դրանով վարակվելու հավանականությունը», – նշեց Շմավոնյանը։
Ինչպես ողջ թվային տիրույթը, այնպես էլ Ransomware-ը շատ արագ է զարգանում, ինչը պահանջում է համապատասխան ռազմավարությունների եւ պայքարի նոր միջոցների ստեղծում։ Վերջինները ներկայացված են «No More Ransom» կազմակերպության կայքում։
Իսկ վիրուսից ազատվելու եւ տվյալները ապակոդավորելու պարտադիր պայման են Private Key-երը, որոնց 7 հազար տարբերակ հրապարակել է ԱՄՆ-ի «Ֆեդերալ հետաքննությունների բյուրոն (FBI)։
