Տեսողական խնդիրներ ունեցողները և չտեսնողներն ինչպե՞ս են սովորում պարել։ Այս մասին են պատմում «Չտեսնված» փոդքասթի հեղինակներից ԵՊՀ ուսանող Վահան Դիշլանյանը ու Հայաստանի կույրերի միավորման Սոկրատ Շահնազարյանի անվան մշակույթի տան տնօրեն Սիփան Ասատրյանը՝ փոդքասթների շարքի առաջին էպիզոդում։
Այս շարքը «Ինտերնետ հանրություն» հասարակական կազմակերպության և Կույրերի միավորման մշակույթի տան նոր համագործակցության արդյունքն է։ Փոթքասթեր Քրիստիան Գինոսյանի համակարգմամբ միության անդամները նախ անցել են փոդքաստի դասընթաց, ապա սկսել մեդիաարտադրանքի փուլը։
Այս նախաձեռնությամբ ԻՀ ՀԿ-ն՝ իր գործընկերների հետ, նպաստում է հատուկ կարիքներով անձանց մեդիաինտեգրմանը՝ նոր մեդիա ձևաչափերի միջոցով նրանց հնարավորություն տալով ստեղծելու սեփական բովանդակությունը, ներկայացնելու համայնքի խնդիրներն ու պատմությունները և ակտիվ ներկայություն ունենալու մեդիա դաշտում։
Փադքաստի ծրագիրը շարունակական աշխատանքի մաս է, որն իրականացվում է նաև «Ինտերնետ հասարակության Հայաստան հատված» ՀԿ-ի հետ համագործակցությամբ։ Դեռ 2024-ին կազմակերպությունը՝ Հեռահաղորդակցության միջազգային միության (International Telecommunication Union) աջակցությամբ, վերազինել է մշակույթի միության շենքում ավելի վաղ ստեղծված «Մենք» ինտերնետային ռադիոյի ձայնագրման ստուդիան՝ ժամանակակից մեդիա բովանդակության ստեղծման հնարավորություններն ընդլայնելու և հարթակի վերագործարկումն ապահովելու նպատակով։
«Մենք» (radio-menq.am) ինտերնետային ռադիոն ստեղծվել է 2016 թվականին «Ինտերնետ հանրություն» ՀԿ-ի նախաձեռնությամբ՝ գլոբալ Internet Society-ի ֆինանսավորմամբ և Կույրերի միավորման աջակցությամբ։ Այն ծառայել է որպես տեղեկատվական և կրթական հարթակ տեսողական խնդիրներ ունեցող անձանց համար՝ առաջարկելով ինչպես հաղորդաշարեր, այնպես էլ աուդիոգրքեր։
«Չտեսնված» փոդքաստի մյուս հեղինակներն առաջիկայում կներկայացնեն իրենց էպիզոդները՝ շարունակելով բարձրաձայնել համայնքի խնդիրներն ու ներկայացնել նրանց փորձը։
