Հայաստանի ազգային դոմենի՝ .am-ի ստեղծման եւ համացանցի Հայաստան բերելու երեսնամյակը լրացավ այս տարի։ Ի նշանավորումն այս կարեւոր իրադարձության՝ «Ինտերնետ հանրություն» ՀԿ-ն՝ որպես շրջադարձային այդ գործի նախաձեռնող եւ իրականցնող, տասնամյակների պատմությունը ներկայացրեց «Համացանցի մեր տարածքը՝ .am30» փաստագրական ֆիլմով։
Ֆիլմի երեսուն րոպեներում խտացվել են Հայաստանը տեխնոլոգիական առաջընթացին մասնակից դարձնելու կարեւոր պատմական պահերը, որոնք համացանցի եւ .am-ի կայացման ընթացքի յուրօրինակ արձանագրությունն են։
Հերոսները մեր երկրի համացանցային իրականության ու հնարավորությունների հիմքը դրած նվիրյալներն են ու տարբեր ժամանակահատվածներում նրանց միացած մասնագետները։ Կիսվում են իրենց հիշողություններով, որոնք ոչ միայն .am-ի ստեղծման ու զարգացման, համացանցի տարածման, այլեւ Հայաստանի դժվարագույն տարիների զգայական ու փաստական իրապատումն են։
«Համացանցի մեր տարածքը՝ .am30»-ում վերականգնվել է դժվարությունների հաղթահարման ու հաջողությունների հաստատման հետագիծը, ուրվագծվել ապագայի անելիքը Հայաստանի տեղը թվային աշխարհում ամրապնդել ու ընդլայնելու համար։
