Տեսողական խնդիրներ ունեցող անձանց մեդիաինտեգրմանն ուղղված «Չտեսնված» փոդքասթի չորրորդ էպիզոդում՝ «Փոքր ու մեծ զրույցներ» են։ Այս անգամ եթերում հայր ու դուստր են՝ Անդրանիկ և Նարե Քոչարյանները։ Նրանք խոսում են ընտանիքի առօրյայի, համատեղ զբաղմունքների, երեխաների ազատ ժամանակի և հաշմանդամություն ունեցող ծնող ունենալու առանձնահատկությունների մասին։
Փոդքասթը վարում է Անդրանիկ Քոչարյանը, իսկ նրա 9-ամյա դուստրը՝ Նարեն պատմում է իր սիրելի զբաղմունքների՝ երգելու, նկարելու և գրքեր կարդալու մասին։ Փոքրիկ զրուցակիցը խոսում է նաև ազատ ժամանակի կարևորությունից. «Երեխաները պետք է զբաղված լինեն, բայց չափից շատ ծանրաբեռնվածությունը նույնպես ճիշտ չէ, քանի որ երեխաներին անհրաժեշտ է ժամանակ հատկացնել իրենց սիրելի զբաղմունքներին և հանգստին»։
Փոդքասթի հեղինակի համար սա նաև անձնական նախաձեռնություն է։ Նա նշում է, որ վաղուց էր ցանկանում դստեր հետ փոդքասթ ձայնագրել, և այդ գաղափարը հնարավոր դարձավ «Չտեսնված» նախագծի շրջանակում։ Ընտանիքը չի բացառում, որ ապագայում այս ձևաչափը շարունակական դառնա և վերածվի ընտանեկան փոդքասթի՝ մայրիկի մասնակցությամբ։
«Չտեսնված» փոդքասթի շարքը ստեղծվում է «Ինտերնետ հանրություն» հասարակական կազմակերպության նախաձեռնությամբ՝ համագործակցությամբ Հայաստանի կույրերի միավորման Սոկրատ Շահնազարյանի անվան մշակույթի տան հետ և փոդքասթեր Քրիստիան Գինոսյանի համակարգմամբ։ Նախագծի նպատակը տեսողական խնդիրներ ունեցող անձանց մեդիա հմտությունների զարգացումն է։
Նախաձեռնությունն իրականացվում է «Ինտերնետ հանրություն» ՀԿ-ի և «Ինտերնետ հասարակության Հայաստան հատված» ՀԿ-ի համագործակցության շրջանակում։ 2024-ին, Հառահաղորդակցության միջազգային միության՝ ITU-ի աջակցությամբ, վերազինվել է «Մենք» ինտերնետային ռադիոյի ձայնագրման ստուդիան՝ ժամանակակից պայմաններ ստեղծելով մեդիա բովանդակության արտադրության համար։
